Mjöl og lýsi fyrir 1,5 milljarð í þrjú skip
Setja bókamerki
Tvö skip komu til Neskaupstaðar um helgina og lestuðu mjöli, um 1.200 tonn hvort. Auk þess hefur verið unnið að því í dag að koma 2.000 tonnum af lýsi um borð í Key Fighter áður en það leggur frá bryggju. Fram kemur í færslu á vef Síldarvinnslunnar að verðmæti afurðanna sem þessi þrjú skip munu flytja til kaupenda er um 1,5 milljarður króna.
Þar er sagt frá því að mjöli hafi verið útskipað 21 skipti í Neskaupsstað það sem af er ári, en auk þess hefur talsverðu magni verið flutt til fóðurverksmiðjunnar Laxár á Akureyri. Alls er búið að skipa út 27.700 tonnum af mjöli og 11.400 tonnum af lýsi það sem af er árinu.
237 þúsund tonn af hráefni
Það hefur verið í nógu að snúast í fiskmjölsverksmiðju Síldarvinnslunnar í Neskaupstað á árinu er haft eftir Hafþóri Eiríkssyni verksmiðjustjóra í færslunni. „Þetta ár verður svo sannarlega stórt hjá okkur í þessum iðnaði,“ segir hann.
„Á fyrstu níu mánuðum þessa árs hefur verksmiðjan hér í Neskaupstað tekið á móti 145 þúsund tonnum af hráefni og það er jafn mikið og báðar verksmiðjur fyrirtækisins tóku á móti allt árið í fyrra. Verksmiðjurnar tvær, hér í Neskaupstað og á Seyðisfirði, hafa tekið á móti 237 þúsund tonnum það sem af er þessu ári og þar af er hlutur Seyðisfjarðarverksmiðjunnar 92 þúsund tonn.“
Hafþór vekur athygli á því að í Neskaupstað er ekki aðeins mikið að gera í framleiðslunni heldur hafi einnig verið unnið að framkvæmdum við verksmiðjuna.
„Verið er að stækka verksmiðjuna þannig að hún mun afkasta 2.000 tonnum á sólarhring og að auki er byggð lítil verksmiðja sem afkastar 380 tonnum. Nú fer að líða að því að litla verksmiðjan verði prufukeyrð en stækkunin verður vart tilbúin fyrr en í janúarmánuði. Hráefnið sem verksmiðjan á Seyðisfirði tekur á móti er fyrst og fremst kolmunni og loðna, en verksmiðjan í Neskaupstað tekur á móti kolmunna og að auki loðnu, síld og makríl frá fiskiðjuveri Síldarvinnslunnar. Það hefur verið mikil vinnsla í fiskiðjuverinu og allur afskurður þaðan og allt sem flokkast frá kemur til vinnslu í verksmiðjunni,“ segir Hafþór.
Glæpastarfsemi orðin mun skipulagðari
Búið að fella björninn
Gerðu umfangsmiklar loftárásir á Líbanon
Maðurinn sem leitað var að fannst látinn
Davíð Viðarsson var skyndihugdetta
Vangaveltur gengu lengra en innistæða var fyrir
Óánægja er með áform um efnistöku
Finnar og Svíar taka ekki á móti særðum frá Gasa