HönnunarMars | 5. maí 2023

Endurútgefa klassíska hönnun Gunnars

Hönnunarhátíðin HönnunarMars var opnuð formlega í gær. Í tilefni af hátíðinni hefur hönnunarfyrirtækið Fólk ákveðið að endurútgefa klassíska íslenska húsgagnahönnun eftir Gunnar Magnússon.

Endurútgefa klassíska hönnun Gunnars

HönnunarMars | 5. maí 2023

Stílhrein hönnun! Gunnar hannaði látlaus og vönduð húsgögn á ferli sínum. Hér má sjá sófann INKA sem tilheyrir línunni sem hefur verið endurgerð hjá Fólk.

Gunnar var afkastamikill hönnuður á Íslandi á tímabili sem spannar nokkra áratugi. Hann hannaði húsgögn fyrir Hótel Holt, Íslandsbanka og Alþingi, enda var innflutningur á húsgögnum bannaður á þessum tíma. Gunnar hlaut heiðursverðlaun Hönnunarverðlauna Íslands árið 2021. Á laugardaginn verður Tinna Gunnarsdóttir hönnuður og dóttir Gunnars gestur í sýningarrými Fólks á Hafnartorgi. Eva María Jónsdóttir fjölmiðlakona og jógakennari stýrir samtalinu og mun ræða við Tinnu um verk föður hennar og hvaða þýðingu þau höfðu fyrir íslenska hönnunarsögu.