Gunnar Dan Wiium, smíðakennari og hlaðvarpsstjórnandi, segir CBD olíu og smáskammta af sveppum hafa breytt lífi sínu. Gunnar, sem er nýjasti gesturinn í podcasti Sölva Tryggvasonar. Hann segir að fólk verið að hætta að skammast sín og vera í feluleik með ákveðna hluti.  

„Sveppurinn, bæði í smáskömmtun og „full dose“ ferðalög sem fólk er að fara í er orðið gríðarlega útbreitt. Það er fólk í öllum samfélagsstéttum og öllum samfélagsstigum að taka þetta út um allan bæ. En það er verið að gera það í laumi og í skuggum og oft þorir fólk ekki að segja neinum frá. Við eigum að opna á þessa umræðu og hætta laumuleiknum og skömminni í kringum þetta. Það getur verið mjög mikilvægt að fólk þori að standa með sínum sannleika, burt séð frá þvi hvað fólki finnst og stundum meira að segja burt séð frá því hvað lögin segja. Það er sama með sveppinn eins og CBD að mjög margir eru að fá bót á alls kyns kvillum og bætta líðan með réttri notkun,” segir Gunnar, sem sjálfur mætti með poka með smáskömmtum af sveppum í viðtalið til Sölva.

Hann segir að CBD olía hafi gjörbreytt lífi sínu og átt stóran þátt í að hjálpa sér að ná bata eftir áralanga neyslu og álag á tauakerfið. Hann lýsir því í þættinum þegar hann byrjaði að prófa CBD olíu í gegnum vin sinn. 

„Ég fæ hjá honum einhverjar flöskur og fer að prófa þetta og ég var bara í laumuneyslu með þetta í talsverðan tíma. Gagnvart konunni minni, samfélaginu og öllum. En svo er þetta stöðvað að leyfa innflutning á flöskunum og þetta var mjög umdeilt. Ég var að kaupa þetta á svarta markaðnum. Það að hitta einhvern díler á bílaplani í laumi og rétta honum tuttugu þúsundkall fyrir einhverja skítaolíu var mjög súrt. Það að þurfa að fara þessa leið var óþægilegt og sem betur fer er þetta allt breytt í dag. Ég segi fullum fetum að CBD olía hafi gjörbreytt lífi mínu. Fólkið sem stofnaði Hampfélagið á stóran þátt í því að CBD olía var loksins leyfð á Íslandi og ég á þeim mikið að þakka. Neysla á CBD er orðin útbreidd á Íslandi og er bæði að sporna við kannabisreykingum hjá mörgum og að hjálpa til við alls kyns taugakerfiskvilla, kvíða og fleira.“

Gunnar segir að ef þess þurfi væri rétt að gefa sérfræðingum bara fullt leyfi á að nota þessi efni til að hjálpa til við að lækna fólk. 

„Ef við viljum halda okkur inni í akademíska kerfinu og hjá læknum og sérfræðingum, þá gerum við það bara. Þá förum við bara í það að gefa lækninum fullt skotleyfi á að skoða hverjum kannabis eða sveppur getur hjálpað og vinna svo með það. Það er galið að fólk sem hefur náð að snúa við lífi sínu og laga heilsuna þurfi að vera í feluleik og skömm með það sem sannarlega hefur hjálpað,“ segir Gunnar og bætir við að efni eins og Cannabis og sveppir séu samofin sögu mannkyns og áhrif þeirra á líkama og vitund séu allt annars eðlis en aggressívari efni eins og kókaín og amfetamín.

„Ef við horfum á stríðsrekstur og græðgi og fleira sem við ættum öll að vera sammála um að séu neikvæðir hlutir, þá er alveg ljóst að það er knúið áfram af efnum eins og kókaíni og amfetamíni, á meðan sveppir og cannabis setja fólk í allt annars konar ástand og búa til möguleika á að fara inn á við.“

Gunnar veit af eigin raun hvað það er að fara á botninn í neyslu og segir mikilvægt að ræða um þessa hluti ef þeir geti hjálpað fólki að ná vopnum sínum á ný. Hann var kom­inn niður fyr­ir 50 kíló eft­ir mikla kókaínn­eyslu þegar verst lét. Í dag er hann edrú og hef­ur snúið lífi sínu gjör­sam­lega við. Hann lítur ekki á smáskammtainntöku af sveppum sem neyslu.  

„Kókaínið hirti mig svo gjör­sam­lega, þó að í raun sé það mjög vont efni í alla staði og áhrif­in ekki einu sinni góð. Þetta var yf­ir­leitt mest spenn­andi þegar ég var að bíða eft­ir dílern­um og kannski fyrstu mín­út­urn­ar eft­ir að ég tók inn efnið. En þetta efni endaði á að rúa mig gjör­sam­lega inn að beini. Tótal egógeðveiki þar sem þú miss­ir sjón­ar á öllu og hætt­ir að borða og sofa svo mánuðum skipt­ir. Ég mis­notaði líka THC í mörg ár, sem jók svo enn á þung­lyndið, sem keyrði mig inn í mína fyrstu grein­ingu sem Bipol­ar,“segir Gunnar, sem lýs­ir ákveðnu at­viki sem varð til þess að allt breytt­ist í lífi hans, skömmu eft­ir að hann varð edrú, gjör­sam­lega bú­inn á lík­ama og sál. 

„Það sem ger­ist fyr­ir mig þrem­ur vik­um eft­ir að ég stöðvaði neysl­una mína árið 2016 er eitt­hvað sem ég get eig­in­lega ekki út­skýrt al­menni­lega. Ég sit í mikl­um frá­hvörf­um af öll­um þess­um efn­um og var í raun al­gjört flak bæði lík­am­lega og hug­ar­fars­lega. Stoðkerfið var í hakki og ég var með sprung­in sár um lík­amann og fleira. En þá varð atvik sem endaði með óút­skýr­an­legri heil­un og ég gekk út sem al­gjör­lega nýr maður og leið eins og ég væri heill. Út frá þessu byrjaði ég að fyr­ir­gefa sjálf­um mér og lífið var bara gjör­breytt.“

Hægt er að hlusta á brot úr þáttum Sölva Tryggvasonar á hlaðvarpsvef mbl.is.