Forseti Finnlands bjartsýnn á stuðning Tyrkja

Niinisto telur að hægt verði að leysa málið með uppbyggilegu …
Niinisto telur að hægt verði að leysa málið með uppbyggilegu samtali. AFP/Anders WIKLUND

Sauli Niinistö, forseti Finnlands, segist vera bjartsýnn á að hægt verði að tryggja stuðning Tyrklands við inngöngu Finna og Svía í Atlantshafsbandalagið, þrátt fyrir að forseti Tyrklands, hafi lýst því yfir að hann muni ekki styðja umsóknir ríkjanna. AFP-fréttstofan greinir frá.

„Ég er sannfærður um að með uppbyggilegu samtali verði hægt að leysa þessa stöðu,“ sagði Niinistö þegar hann ávaraði sænska þingið í dag. „Ég er bjartsýnn,“ bætti hann svo við.

Sænska utanríkisráðuneytið greindi frá því í gær að háttsettir er­ind­rek­ar frá Svíþjóð og Finn­landi myndu ferðast til Tyrk­lands á næst­unni til að ræða málið við þarlenda embættismenn, en löndin hyggjast sækja sameiginlega um aðild. 

Recep Tayyip Er­dog­an, forseti Tyrklands, sagði hins veg­ar á blaðamanna­fundi í An­kara í gær vegna op­in­berr­ar heim­sókn­ar Abdelma­djid Teb­bou­ne, for­seta Als­írs, að diplómat­ar ríkj­anna ættu ekki „að ómaka sig“ við að koma til Tyrk­lands til þess að reyna að fá Tyrki til að skipta um skoðun. 

„Hvorugt þessara ríkja hefur tekið skýra afstöðu gegn hryðjuverkasamtökum,“ sagði Erdogan sem vill meina að ríkin hafi stutt við „hryðjuverkastarfsemi“ með því að leyfa Kúr­d­um að sinna stjórn­mála­starfi í lönd­um sín­um.

Öll aðildarríki NATO þurfa að samþykkja inngöngu nýrra ríki í bandalagið, en bæði Svíar og Finnar töldu sig hafa fengið jákvæð viðbrögð allra aðildarríkja við hugsanlegri umsókn. Niinisto sagði að hann hefði átt samtal við Erdogan fyrir um mánuði síðan og þá hefði hann tekið vel í hugmynd um aðildarumsókn Finna.

 

mbl.is