Umdeild túlkun kemur í veg fyrir val á Alberti
Setja bókamerki
Fjarvera Alberts Guðmundssonar úr landsliði Íslands fyrir vináttuleik liðsins gegn Englandi helgast af þröngri túlkun á óskýrum reglum KSÍ um það hvenær mál eru til meðferðar hjá lögreglu eða ákæruvaldi.
Eins og fram hefur komið var rannsókn á meintu kynferðisbroti Alberts felld niður. Alla jafna er það gert þegar mál eru talin ólíkleg til sakfellingar fyrir dómi.
Niðurfelling málsins var kærð til ríkissaksóknara af lögmanni meints þolanda í málinu.
Í skilningi laganna er Albert laus allra mála, jafnvel þó niðurstaðan hafi verið kærð.
Umdeild túlkun
Haukur Hinriksson, yfirlögfræðingur KSÍ, segir í samtali við mbl.is að ákvörðun byggi á viðbragðsáætlun sem samþykkt var af stjórn fyrir tveimur árum.
Þar kemur m.a. fram að einstaklingi sé ekki heimilt að spila fyrir landslið á meðan mál tengt honum sé til „meðferðar á rannsóknarstigi eða hjá ákæruvaldi.“
Haukur nefnir þó að þessi túlkun, þ.e. að heimila einstaklinga að spila ekki fyrir hönd lands síns, jafnvel þó málið hafi formlega verið fellt niður, sé umdeild.
„Það er háð túlkun hvenær mál teljast vera til meðferðar eða ekki. Ég er fullmeðvitaður um það að strangt til tekið telja margir málið ekki lengur til meðferðar jafnvel þó niðurfelling hafi verið kærð. En sumir telja hins vegar að málið sé enn til meðferðar hjá viðkomandi,“ segir Haukur.
Reglan sætir endurskoðun
Hann segir að þessi regla sæti endurskoðun. Nýlega lauk vinnu starfshóps sem gert var að endurskoða þessa reglu sem tengist viðbragðsáætlun sambandsins í slíkum málum.
Að sögn hans voru utanaðkomandi aðilar sem eru sérfræðingar í málaflokknum fengnir til verksins. Allir standa þeir utan knattspyrnusambandsins.
Hins vegar á eftir að fara með málið til umfjöllunar hjá stjórn sambandsins og því ekki hægt að tilgreina um það hverjar tillögur starfshópsins eru að svo stöddu.
„Þar á ýmislegt að koma fram sem túlkar reglurnar mun nánar varðandi þau tilvik sem koma upp,“ segir Haukur.
Stjórnarfundur er í lok mánaðar og þar til málið hefur fengið umfjöllun verður vísað í eldri túlkun við meðferð mála að sögn Hauks.
Aron ekki valinn á sömu forsendu
Eitt fordæmi liggur fyrir í sambærilegu máli. Þannig var ákveðið af stjórn að velja ekki Aron Einar Gunnarsson til verkefnis í landsliði fyrir tveimur árum jafnvel þó búið væri að fella niður rannsókn á máli á hendur honum. Sú niðurstaða var kærð til ríkissaksóknara af lögmanni meints fórnarlambs líkt og tilfellið er í máli Alberts. Ríkissaksóknari féllst ekki á kröfu kæranda.
„Stjórn hefur á þessum tímapunkti ekkert að vísa í nema eldri viðbragðáætlun og hún er óskýr hvað þetta varðar,“ segir Haukur.
En hver er ástæðan fyrir því að stjórn velur að túlka málið svo þröngt?
„Það var einfaldlega niðurstaða stjórnar í eldra máli sem tengdist túlkun stjórnar á þeim tíma,“ segir Haukur.
3.300 MW í vinnslu fyrir vindorkuna
Hvergi nærri hætt – Boðar annað útlendingafrumvarp
Segir nýja áætlun setja markið hátt
Ótímasett jarðgöng sögð eina lausnin
Dallas valtaði yfir Boston
Kallar eftir óháðri rannsókn vegna þungra ásakana
Töluverður reykur og vatn inni í Kringlunni
Skilaboðin þau að flóttamenn séu hættulegir