Kjólar Christian Siriano eru þekktir fyrir það að vekja mikla athygli. Hannanir Siriano eru eftirsóttar af ríka og fræga fólkinu og fær hann oftar en ekki sumar af þekktustu stjörnum í heimi til þess að sitja fyrir í nýjustu hönnunum sínum.

Leikkonan Alicia Silverstone, sem margir þekkja sem Cher Horowitz úr kvikmyndinni Clueless, er góðvinkona Siriano, en hún tók þátt í tískumyndatöku fyrir vin sinn við Como-vatn á Ítalíu nú á dögunum.

Silverstone klæddist stórglæsilegum ferskjulituðum kjól sem var það efnismikill að leikkonan átti í stökustu vandræðum með að komast í gegnum dyrnar á glæsivillunni þar sem myndatakan fór fram.

Á miðvikudag birti Siriano myndir af leikkonunni, en þar sést þegar hún reynir að smokra sér inn um dyrnar í þessari heljarstóru hönnun.

Liðsmenn í starfsteymi Siriano mátuðu einnig kjólinn og sátu fyrir á nokkrum myndum.