Karlmaður hefur verið ákærður af embætti héraðssaksóknara fyrir að hafa í tvígang á árinu 2021 viðhaft kynferðislegt tal við stúlkur undir lögaldri, en í ákæru segir að með brotunum hafi hann sært blygðunarsemi stúlknanna og sýnt þeim ósiðlegt athæfi.

Þá er maðurinn jafnframt sakaður um að hafa sent annarri stúlkunni mynd af berum getnaðarlim sínum.

Samskiptin viðhafði maðurinn við stúlkurnar í gegnum samfélagsmiðilinn Snapchat.

Maðurinn dvelur í fangelsi, en ekki kemur fram í ákæru hvort það tengist þessu máli, öðrum kynferðisbrotamálum, eða óskyldum málum.

Fyrri stúlkan, sem nú er orðin eldri en 18 ára, fer fram á að maðurinn greiði sér eina milljón í miskabætur, en foreldrar þeirrar síðari fara fyrir hönd hennar fram á að maðurinn greiði henni sömu upphæð.