Vladimír Pútín, forseti Rússlands, og Bashar al-Assad, forseti Sýrlands, áttu fund í Sochi í Rússlandi í dag.
Dmitry Peskov, talsmaður stjórnvalda í Kreml, segir að ítarlega samræður hafi átt sér stað milli leiðtoganna, sem hittust síðast á rússneskri herstöð í Latakia-héraði í Sýrlandi í desember.
Pútín segir að aðstæður í Sýrlandi eins og þær eru í dag geti leitt til upphafs jákvæðrar pólitískrar þróunar. Rússar hafa lengi verið bandamenn stjórnvalda í Sýrlandi og hófu þátttöku í borgarastríðinu árið 2015. Stríðið hefur staðið yfir í sjö ár. Í desember á síðasta ári tók Pútín þá ákvörðun að draga hluta rússneska hersins til baka frá Sýrlandi.
Pútín sagði í apríl að loftárásir Bandaríkjanna, Bretlands og Frakklands vegna meintrar efnavopnaárásar sem vestræn ríki hafa sakað sýrlensk stjórnvöld um að hafa gert hinn 7. apríl hafi minnkað möguleikann á pólitískri lausn í Sýrlandi. Nú virðist hann sjá möguleika á að ná sáttum.