Sveindís Jane Jónsdóttir, landsliðskona í knattspyrnu, skoraði eitt marka Wolfsburg og lagði upp annað þegar liðið vann öruggan útisigur á Werder Bremen í þýsku 1. deildinni í kvöld.
Wolfsburg er þegar búið að tryggja sér annað sæti deildarinnar, en Íslendingalið Bayern München er þýskur meistari.
Sveindís Jane lék allan leikinn fyrir Wolfsburg í kvöld og kom liðinu í 2:0 sjö mínútum fyrir leikslok. Lagði hún svo upp þriðja markið tveimur mínútum síðar.
Var þetta þriðja deildarmark hennar á tímabilinu í tíunda leiknum, en hún missti af helmingi tímabilsins vegna meiðsla.