Magnús Ver Magnússon, fyrrverandi handhafi titilsins sterkasti maður heims, fær 600 þúsund krónur í miskabætur frá ríkinu vegna ólögmætra þvingunarráðstafana við rannsókn lögreglu á meintri aðild Magnúsar að stórfelldum fíkniefnainnflutningi. Þetta er niðurstaða Hæstaréttar og var þar með dómur héraðsdóms staðfestur í málinu. Magnús hafði farið fram á 10 milljónir í skaða- og miskabætur.
Frétt mbl.is: Fer fram á 10 milljónir í Hæstarétti
Fylgst var með Magnúsi með ýmsum hætti meðan rannsóknin stóð yfir, meðal annars var sími hans hleraður og settur var eftirfarar- og hlustunarbúnaður í bifreið hans. Seinna var rannsóknin á Magnúsi látin niður falla og var honum tilkynnt um eftirlitið.
Ríkið viðurkenndi bótaskyldu í málinu en taldi 10 milljónir of háa upphæð. Taldi Magnús aftur á móti að notkun þvingunarúrræða lögreglunnar hefði verið beitt í andstöðu við lög og að upplýsingar sem urðu til þess að tengja Magnús fyrst við málið hafi verið óáreiðanlegar. Þá hafi rannsóknartímabilið verið óeðlilega langt og bryti á friðhelgi einkalífs Magnúsar og fjölmiðlaumfjöllun um málið hafi skaðað Magnús.
Lögmaður ríkisins taldi lengd rannsóknarinnar aftur á móti ekki óeðlilega enda væru stór fíkniefnamál umfangsmikil og tækju jafnvel ár í skipulagningu.
Magnúsi var dæmd gjafsókn í málinu, bæði vegna dómskostnaðar og málflutningsþóknunar lögmanns hans upp á hálfa milljón.