Kona nokkur hefur vakið mikla reiði á samfélagsmiðlum eftir að myndband af henni fór í dreifingu þar sem hún sést dreifa ösku látins bróður síns í sundlaug á klúbbi á Ibiza.

Myndskeiðinu deildi konan fyrst sjálf á TikTok-reikningi sínum, en þar sést hún dansa við tónlist í sundlaugapartíi áður en hún hellir ösku ofan í troðfulla laugina. Atvikið átti sér stað á hinum fræga sundlaugaklúbbi Ushiaia, en við myndskeiðið skrifaði hún: „Bara ég að strá bróður mínum um Ushiaia.“

Myndskeiðið hefur farið eins og eldur í sinu um samfélagsmiðla og vakið mikla reiði og óhug hjá fólki, en margir hafa gagnrýnt konuna harðlega. Hins vegar voru aðrir sem sáu ekkert athugavert við gjörðir konunnar á meðan fjölmargir veltu því fyrir sér hvernig henni tókst að smygla duftkerinu framhjá öryggisvörðum klúbbsins.