Íslandsvinkonan og sjónvarpskonan Vicky Pattison birti á dögunum myndaröð á Instagram-reikningi sínum þar sem hún deildi óunnum og hráum myndum sem fæstir myndu trúlega kjósa að deila með rúmlega fimm milljónum fylgjendum sínum. Með myndaröðinni vill hún vekja athygli á því hve villandi mynd samfélagsmiðlar geta dregið upp af fólki. 

Í myndaröðinni birti Pattison óunnar myndir af sér farðalausri og frá ólíkum sjónarhornum til þess að árétta að hún líti ekki alltaf út eins og á „flottustu“ myndunum sínum þar sem hún hefur eytt mörgum klukkutímum í förðun og hárgreiðslu, og tekið myndirnar frá „rétta“ sjónarhorninu og í „réttu“ birtunni. 

Vill sýna báðar hliðar á samfélagsmiðlum

Við myndaröðina birti Pattison uppörvandi skilaboð til fylgjenda sinna þar sem hún hvatti þá til að láta að því er virðist „fullkomnar“ Instagram-myndir ekki hafa áhrif á sjálfsvirðingu þeirra. „Að fletta örsnöggt í gegnum Instagram getur sannfært mann um að allir séu með hinn fullkomna líkama, enginn taki nokkurn tímann slæma mynd, húðin á öllum sé fullkomlega slétt og allir séu með allt á hreinu,“ skrifaði hún. 

„Ég hélt að ég hefði sýnt báðar hliðar peningsins á Instagram-síðu minni, en eftir að hafa flett í gegnum reikninginn í morgun áttaði ég mig á að það voru líklega allt of margar vandlega uppstilltar glamúrmyndir og flottar auglýsingar. Svo hér eru nokkrar myndir af raunveruleikanum mínum - raunveruleika sem ég skammast mín ekki fyrir, heldur er virkilega stolt af,“ bætti hún við. 

Í færslunni sagði hún fylgjendum sínum frá því að hún væri með hrukkur, appelsínuhúð, maga, dældir í húðinni, engar varir „miðað við aðra á miðlinum“, og undirhöku. Hún sagðist eiga góð sjónarhorn og slæm, góða daga og slæma. Allt séu þetta eðlilegir hlutir sem samfélagið hafi reynt að sannfæra okkur um að geri okkur á einhvern hátt minna eftirsóknarverð.

„Ekkert af þessu gerir mig að verri manneskju, og ef þú spyrð mig þá er miklu meiri fegurð í hráum raunveruleikanum,“ bætti hún við.