Kristrún Frostadóttir, formaður Samfylkingarinnar, segist ekki trúa öðru en að skoðað verði að takmarka leyfi um skammtímaleigu til að bregðast við húsnæðisskorti Grindvíkinga.

Þetta segir Kristrún í samtali við FF7.is í dag.

Segir Kristrún að á tímum sem þessum hljóti allt að koma til greina. Margir Grindvíkingar búi í sumarbústöðum, atvinnuhúsnæði og í híbýlum vina og vandamanna. Á sama tíma séu þúsundir íbúða fráteknar fyrir skammtímaleigu ferðamanna, jafnvel allan ársins hring.

Frétt af mbl.is

Gos ekki ólíklegt í bænum, verði annað kvikuhlaup

Njóti skakkrar samkeppnisstöðu

Segir hún íbúðirnar jafnframt njóta skakkrar samkeppnisstöðu meðal annars vegna reglugerðar, sem Þórdís Kolbrún R. Gylfadóttir sem ráðherra ferðamála á þeim tíma en nú fjármálaráðherra, setti árið 2018.

„Afleiðing er sú að skammtímaleiguíbúðir sem reknar eru sem hótelíbúðir borga lægri fasteignaskatta en annar atvinnurekstur í landinu.

Ég trúi ekki öðru en að ríkisstjórnin skoði þennan möguleika, enda allt undir í aðstæðum sem þessum,“ sagði Kristrún.

Frétt af mbl.is

Sjálfsagt að breyta reglugerð um Airbnb ef þarf

Tryggja húsnæði fólks sem býr og starfar í landinu

Samkvæmt mælaborði ferðaþjónustunnar voru á suðvesturhorninu um 2.500 íbúðir til leigu síðastliðið sumar.

Samfylkingin boðaði fyrr í vetur aðgerðir til að ná stjórn á skammtímaleigu. Kristrún segir stöðuna á húsnæðismarkaðnum erfiða og nú þurfi að leita leiða til að tryggja húsnæðisöryggi fólks sem býr og starfar í landinu.

„Samfylkingin er að minnsta kosti tilbúin í þetta samtal,“ sagði Kristrún.