Volodimír Selenskí, forseti Úkraínu, segir Rússa styðja Hamas-samtökin í átökunum sem nú standa yfir milli samtakanna og Ísrael.
„Við erum viss um að Rússar styðji aðgerðir Hamas með einum eða öðrum hætti,“ er haft eftir Selenskí í umfjöllun AFP.
Forsetinn segir yfirstandandi átök bera vitni um það að Rússar reyni að framkvæma aðgerðir sem framkalli óstöðugleika á alþjóðavettvangi.
Þá sagðist hann hafa áhyggjur af því að alþjóðasamfélagið væri nú að hverfa frá stuðningi sínum við Úkraínu í stríðinu gegn Rússlandi vegna harmleiksins sem dunið hefur yfir Ísrael í kjölfar árása Hamas-samtakanna.
„Ég vil ekki gera neinn samanburð. Það er hræðilegt stríð í gangi í okkar landi. Í Ísrael hafa margir misst ástvini. Þessar hörmungar eru ólíkar en báðar stórfelldar,“ segir Selenskí og varar við því að ef athygli heimsins á Úkraínu dvíni muni það hafa afdrifaríkar afleiðingar.
„Örlög Úkraínu ráðast af einingu heimsbyggðarinnar. Eining heimsins veltur mjög á einingu Bandaríkjanna,“ segir Selenskí loks og bætir við að gagnsókn Úkraínumanna sem hófst í júní haldi áfram á nokkrum vígstöðvum og taki framförum á þeim öllum.