Þann 20. ágúst síðastliðinn greindu Birgitta Líf Björnsdóttir og Enok Vatnar Jónsson frá því að þau ættu von á sínu fyrsta barni saman. Örfáum vikum síðar fengu landsmenn að vita um kynið þegar parið lét þyrlu dreifa bláum reyk, en þyrlan flaug yfir sjónum fram hjá íbúð þeirra í Skuggahverfinu í september.

Frétt af mbl.is

Birgitta Líf og Enok eiga von á barni

Frétt af mbl.is

Birgitta og Enok tilkynntu kynið með þyrlu

Nú eru aðeins vikur í að sonur þeirra Birgittu Lífar og Enoks Vatnars komi í heiminn og hefur það ekkert hægt á áhrifavaldinum og markaðsstjóra World Class. Frá því hún tilkynnti um óléttuna í ágúst hefur hún verið á ferð og flugi um gjörvallan heim og farið í það minnsta fimm utanlandsferðir ásamt slökunar- og dekurferð norður á land.

Lúxus á Amalfi-ströndinni

Örfáum dögum eftir að parið greindi frá gleðitíðindunum flaug það á vit ævintýranna til Amalfi-strandarinnar, sem er strandlengja á suðurhluta Ítalíu. Strandlengjan þykir einstaklega falleg og er vinsæll ferðamannastaður meðal hinna frægu og ríku.

Birgitta Líf og Enok nýttu tímann vel og sóluðu sig, sigldu meðfram strandlengjunni og versluðu í lúxusverslunum sem er að finna á svæðinu.

Stelpuhelgi á Akureyri

Í október átti Birgitta Líf stelpuhelgi á Akureyri ásamt góðvinkonum sínum. Stúlkurnar kíktu meðal annars í Skógarböðin, þyrluflug og ljúffengan kvöldverð.

50 Cent í Lundúnum

Birgitta Líf og Enok létu sig ekki vanta á stórtónleika rapparans 50 Cent á O2 leikvanginum í Lundúnum snemma í nóvember, en það voru fyrstu tónleikar bumbubúans. Parið nýtti einnig tímann og heimsótti Mayfair-hverfið í Lundúnum.

„Baby Moon“ á Spáni

Parið hoppaði beint frá Lundúnum og yfir til Spánar þar sem óléttukúlan komst aftur í sólina. Birgitta Líf hélt upp á afmæli sambýlismannsins, en Enok fagnaði 22 ára afmæli sínu hinn 17. nóvember síðastliðinn. Parið nýtti tímann í góða veðrinu vel og viðraði óléttukúluna við sundlaugarbakkann og á ströndinni.

Jólagleði í New York

Eftir allan tímann í sólinni flaug Birgitta Líf rakleiðis til New York til að upp­lifa töfra jól­anna þar í borg, en borg­in er sann­kölluð jólap­ara­dís á þess­um árs­tíma.

Frétt af mbl.is

Birgitta Líf gerir vel við sig í New York

Áhrif í París

Gott ferðalag endar alltaf í París!

Birgitta Líf eyddi fyrstu dögum desembermánaðar ásamt góðvinkonum sínum í töfrandi jólafríi í París í Frakklandi og má með sanni segja að bumbubúinn sé nú þegar orðinn heimsflakkari.

Frétt af mbl.is

Aðalskvísur Íslands njóta lífsins í París