Yfir hundrað mótmælendur voru handteknir í Moskvuborg í gær, þar á meðal Alexei Navalny, einn þekktasti aðgerðasinni landsins. Fjöldi mótmælenda var vel á þriðja þúsund, en mótmælin brutust út í kjölfar þess að bróðir Navalny var dæmdur í fangelsi.
Eftir að hafa verið handtekinn var Navalny fluttur aftur á heimili sitt þar sem hann hefur setið í stofufangelsi síðan í febrúar.
Í júlí í fyrra var Navalny dæmdur í fimm ára fangelsi fyrir fjársvik og staðfesti áfrýjunardómstóll sakfellinguna í október. Áfrýjunardómstóllinn batt refsinguna hins vegar skilorði og var Navalny því sleppt úr haldi.
Í febrúar var Navalny aftur handtekinn og hann færður í stofufangelsi vegna nýrra ásakana um fjársvik. Ekki hefur verið réttað í því máli en það snýr að tvöfalt hærri upphæð en hann var dæmdur fyrir í fyrra.
Navalny sem er 38 ára gamall hefur óhræddur gagnrýnt Vladímír Pútín, forseta Rússlands, á undanförnum árum. Sjálfur segir hann að sú gagnrýni hafi orðið til þess að hann sé nú ofsóttur í heimalandinu.
Ákæruvaldið krafðist þess við réttarhaldið fyrr í þessum mánuði að Navalny verði dæmdur í tíu ára fangelsi. Þykja góðar líkur á að það verði raunin.