Yfirmenn rússnesku Wagner-málaliðasveitarinnar segjast hafa náð yfirráðum í ráðhúsi borgarinnar Bakhmút í Austur-Úkraínu og Rússar því með „löglega“ stjórn í borginni.
Stjórnvöld í Kænugarði segja úkraínskar hersveitir enn við stjórn.
Áður en stríðið hófst bjuggu um 70 þúsund manns í borginni. Flestallir íbúar hafa flúið Bakhmút eftir blóðuga bardaga sem hafa staðið í meira en sjö mánuði.
Jevgení Prígosjín yfirmaður Wagner birti myndskeið af sér á Telegram þar sem hann hélt á rússneska fánanum. Sagði hann að hersveitir hans myndu setja fánann á ráðhús Bakhmút.
„Í lagalegum skilningi er borgin okkar,“ sagði Prígosjín í myndskeiðinu.
Úkraínsk stjórnvöld sögðu í kjölfar myndskeiðsins að Wagner-sveitir hefðu reynt að ná yfirráðum í borginni en mistekist.