Íslendingar eru með gott auga fyrir fallegri hönnun. Við deilum mörg lúmskum áhuga á því að sjá inn á heimili annarra, sérstaklega ef þau eru falleg, og sækjum gjarnan innblástur þangað. Þar af leiðandi heillumst við oft af sömu húsmununum sem rata gjarnan á óskalistann.

Y-stóllinn

Þeir sem eiga Y-stólinn ekki nú þegar eru líklega með hann ofarlega á óskalistanum enda klassísk hönnun sem stenst tímans tönn. Stólana hannaði Hans J. Wegner fyrir Carl Hansen & Søn árið 1949. 

Klassísk dönsk hönnun sem marga dreymir um. Ljósmynd/Carlhansen.com

Riffluð glös 

Drykkir verða betri þegar þeir eru í fallegum glösum. Riffluð glös hafa verið að gera allt vitlaust upp á síðkastið og þá sérstaklega rifflaða línan frá danska hönnunarmerkinu Ferm Living. Glösin eru afar stílhrein og rifflurnar gefa þeim sterkan karakter. 

Línan frá Ferm Living er sérlega falleg. Ljósmynd/Fermliving.com

N701 sófinn

N701 einingarsófinn frá Ethnicraft hefur notið gríðarlegra vinsælda fyrir þægindi og útlit. Sófinn er afar stílhreinn og fæst í nokkrum litum, en fallegt form sófans hefur heillað Íslendinga upp úr skónum. 

Drapplitaði N701 sófinn hefur vakið sérstaka athygli enda er hann afskaplega fallegur húsmunur. Ljósmynd/Ethnicraft

Flowerpot ljós

Hin guðdómlegu Flowerpot ljós hafa tekið yfir íslensk heimili á síðustu mánuðum. Ljósin fást sem loftljós, lampar og veggljós og í öllum regnbogans litum. Ljósið er úr smiðju hins danska Verner Panton og leit fyrst dagsins ljós árið 1967. Það er því óhætt að segja að hönnunin sé klassísk.

Flowerpot-lampi í fagurbláum lit. Ljósmynd/Andtradition.com

Pond spegill

Íslendingar hafa tekið ástfóstri við þennan skemmtilega spegil frá danska hönnunarmerkinu Ferm Living. Spegillinn er skemmtilegur í laginu og passar sérstaklega vel inn á stílhrein skandínavísk heimili. Hann gefur hvaða rými sem er karakter og er í þægilegri stærð. 

Spegillinn er skemmtilegur í laginu. Ávalar línur hans virðast hitta beint í mark hjá Íslendingum. Ljósmynd/Fermliving.com

Little Big stóll

Stóllinn hefur mjúkar línur og er sérlega formfagur, en hann var hannaður af Kristian Sofus Hansen og Tommy Hyldahl árið 2019. Stólinn er hægt að fá í mismunandi litum með mismunandi áferð og þykir mikið heimilisprýði.

Formfagur stóll sem hannaður var árið 2019. Ljósmynd/Norr11.com

Veggstjaki

Veggstjakarnir sem Haf Studio-hjónin hanna hafa verið gríðarlega vinsælir, enda falleg og einföld hönnun sem lýsir upp hvaða rými sem er. 

Íslensk hönnun sem gleður augað. Ljósmynd/Hafstore.is

Astep 2065

Stílhrein hönnun úr smiðju Gino Sarfatti, en ljósið var hannað árið 1950 og þykir enn þann dag í dag einstakt. Sporerkjulaga kúpull virðist svífa í loftinu og gefur af sér mjúka og hlýja birtu.

Fallegt ljós sem marga dreymir um. Ljósmynd/Astep.design

String hillukerfið

Sænski arkitektinn Nils Strinning setti hillukerfið String á markað árið 1949, en síðan þá hefur það hlotið fjölmörg hönnunarverðlaun og prýðir ófá heimili fagurkera.

Klassísk hönnun sem býður upp á ótal möguleika og samsetningar. Ljósmynd/Stringfurniture.com

Pappaljós

Pappaljósin hafa komið sterk inn síðustu ár enda veita þau afar milda og fallega birtu. Danska hönnunarmerkið Hay er með gott úrval af hefðbundnum pappaskermum á meðan &tradition er með pappaskerma í mismunandi formum.

Formakami ljósin frá &tradition eru sérlega falleg. Ljósmynd/Andtradition.com

Sjöstrand kaffivél

Klassísk skandínavísk hönnun sem er á óskalista margra. Þetta er kaffivélin sem maður vill hafa upp á borði og verður fljótt hluti af fagurfræði eldhússins, enda minimalísk og klassísk hönnun sem gleður augað. 

Minimalísk og einföld hönnun klikkar ekki í eldhúsið. Ljósmynd/Sjostrand.is