Guðjón Helgason, upplýsingafulltrúi Isavia, segir fyrirtækið vera að fara yfir úrskurð kærunefndar jafnréttismála í máli Þorgríms Baldurssonar gegn opinbera hlutafélaginu.
Hann segir að í fljótu bragði sýnist þeim þó niðurstaðan ekki snúast um starfsaldursregluna sem slíka.
Isavia var óheimilt að segja starfsmanni upp þegar hann varð 67 ára þar sem uppsögnin var aðeins reist á aldri hans. Þetta er niðurstaða kærunefndar jafnréttismála í máli Þorgríms Baldurssonar gegn opinbera hlutafélaginu.
ASÍ kærði málið fyrir hönd mannsins til nefndarinnar, en byggt er á nýjum lögum um jafna meðferð á vinnumarkaði sem tóku gildi 1. september 2018.
Taka lögin til þess að einstaklingar eigi að hljóta jafna meðferð á vinnumarkaði óháð kynþætti, þjóðernisuppruna, trú, lífsskoðun, fötlun, skertri starfsgetu, aldri, kynhneigð, kynvitund, kyneinkennum eða kyntjáningu.
„Við hjá Isavia ANS erum að fara yfir úrskurðinn til að meta áhrif hans. Í fljótu bragði sýnist okkur niðurstaðan snúast um framkvæmd starfsloka í þessu tiltekna máli en ekki starfsaldursregluna sem slíka,“ segir Guðjón í samtali við mbl.is.