Gisting | 26. janúar 2023

Langar þig í útilegu en hefur áhyggjur af veðurspánni?

Við Íslendingar þekkjum það manna best að vantreysta veðurspánni, enda virðast veðurguðirnir ekki alltaf vera með okkur í liði. Þar af leiðandi getur það reynst erfitt að skipuleggja útilegu langt fram í tímann. Innanhúshönnuðurinn Simone Kovac er með bráðsnjalla lausn sem tryggir skothelda útilegu, sama hvernig viðrar.

Langar þig í útilegu en hefur áhyggjur af veðurspánni?

Gisting | 26. janúar 2023

Ljósmynd/airbnb.com

Í Graz í Austurríki hefur Kovac innréttað þakíbúð sína á ævintýralegan máta. Þetta gæti verið litríkasta íbúð sem þú hefur séð, en það er þó fleira en litagleðin sem gefur íbúðinni sérstöðu. Í miðri stofunni má sjá glæsilegt Caravan Westfalia hjólhýsi af árgerðinni 1964 sem býður gestum að fara í útilegu með lítilli sem engri fyrirhöfn.

Kovac er þekkt fyrir að hugsa út fyrir boxið í hönnun sinni, en í þessari íbúð hefur hún endurhugsað hið hversdagslega svefnherbergi eins og við þekkjum það flest og notar þess í stað hjólhýsi sem svefnherbergi. Það er óhætt að segja að hjólhýsið setji einstakan svip á rýmið sem þegar hefur mikinn karakter, og býr til mikla sumarstemningu.

Íbúðin er til útleigu á Airbnb, en alls rúmast fjórir gestir þar hverju sinni. Yfir vetrartímann kostar nóttin í íbúðinni 105 bandaríkjadali, eða um 15 þúsund krónur á gengi dagsins í dag.